轉載自香港人網「風暴理論及警長理論」by Enterprise:

以下我會試圖用打 8 號風球嘅譬諭去解釋香港金融市場係 9 月第一週所發生嘅現象。

我認為香港係 9 月第一週,係進入咗金融風暴嘅風眼中。響金融風暴嘅左面,係以美國次按問題等一連串經濟不利因素做武器嘅大莊;而響右面,就係以港股直通車為代表嘅各方金融洪水。

我會嘗試用 "風暴理論" 去解釋 3/9-7/9 港股窄幅上落、港匯高企、拆息高企等現象。而港府入市買 388 嘅原因,則會用 "警長理論" 來解釋。

以 "風暴理論" 去解釋 3/9-7/9 港股窄幅橫行,好似好牽強,其實不然。響金融風暴嘅左右兩方,都係巨大嘅經濟力量。係互相制衡下,係會有一時嘅風平浪靜。而左面嘅經濟力量,已經定好響 7/9 發難;右面嘅經濟力量,則因為亞爺嗌停咗港股直通車,各方熱錢變成"蛇無頭不行"。所以港府呢個警長,唯有出嚟 show show 支炮仔,警告眾大鱷:唔好亂嚟!

先詳細講講金融風暴嘅左面:我認為響西方陣營中,有大莊籌備經年,準備係今年做淡(87, 97, 07.....)。8 月份嘅第一波發生響 3/8 ,當日係美國發表 7 月份 unemployment rate 同 non-farm payroll 嘅日子。(當時 unemployment rate 預測 4.5%,實際 4.6%,數據唔係特別差。) 數據一出,演變為 8 月份美股大跌序幕。美股震波逐步殺至香港,一波強於一波,至 17/8 港股大跌 1,200 點。若當日港股收市跌幅有 800 點,則震波便會帶回美國,引發更大振盪。但係結果當日港股反彈 1,000 點,預期帶回美國嘅震波冇咗,美股企穩,精心部署搵大茶飯嘅計劃衰咗,原因就係亞爺出口術,一招港股直通車攪到個震波消失。

如果大家有睇過 The Core (地心浩劫) 呢套電影便會明白我想講嘅係乜嘢。 套戲講地球的地幔動不明原因地逐步減少,以致磁場減弱。在失去地磁的保護下,地球會遭到致命的高能宇宙微波輻射襲擊,造成災難。一隊科學家駕駛地心潛艇,鑽進熾熱地幔,放置並引爆核彈,使地幔再次轉動,把地磁再生。當時科學家嘅計算出咗錯,以為將所帶嘅核彈一次過爆晒,就會令地幔再次轉動。係發現錯誤後,佢地發現分散核彈,逐個引爆,一個震波帶動下一個震波,係會產生更大威力,使地幔再次轉動,最後呢個方法係 work 嘅。

返回現實世界,次按問題最先由 HSBC 帶出,震波最細。輪到美國,震波又大咗 d ,去到德國個震波又再大 d ,去到法國嘅 BNP 爆大鑊嘅時候,個震波已經好大,帶起其他問題如 carry trade 拆倉、Yen 急升等現象。震波去到日本,受 Yen 急升嘅影響下,日股都大跌 800 點。至於香港,大家都記憶猶新 -- 跌 1,200 點個一日係無人會忘記嘅。如果個震波繼續落去,全球股災,應該冇得走雞!但係世事就係咁奇怪,精心策劃嘅行動係可以死得不明不白,而源頭只不過係有人出口術!

8 月後半段,全球股市大致企穩。大莊自然唔會甘心,一定會部署反擊。當時我想如果我係大莊,我會點樣做。

回顧當時美國嘅情況:美國減貼現率,市場焦點轉為觀察聯邦基金利率會唔會減,有利美股企穩。債息唔過 4.8 厘,情況如果能夠維持至 10 月,樓按可順利過關。油價亦下跌至 70.xx / 71.XX 左右,通脹可能受控。Yen 價返回 115 水平,carry trade 拆倉潮暫退。總而言之,美國經濟似乎尋找到新嘅 equilibrium point,只要能夠維持一段時間,美國經濟便能自行療傷,走出困境。

好了,如果我係大莊,我會點樣部署反擊。當時我便認定四個環節,可以動搖美國經濟,打翻剛剛建立的 equilibrium point,分別為:

Housing

Inflation

Unemployment

同埋 Yen/Carry Trade

我係 8 月中曾出 post 探討呢個問題,當時次按已成舊聞,再炒作威力亦有限。我認為 weakliest link 在信心問題 -- 若果能夠重燃通脹憂慮,則減息期望便會落空,這樣便能在股票市場上下其手。而油價正處於低水平,若推升油價,必定能夠重燃通脹憂慮,再配合 unempolyment rate 係 7/9 公佈,必定能再下一城。

今天重看當時的推論,實在非常粗疏。因為大莊嘅手法更為徹底!油價由低位推上至 76.XX 水平,Yen 價操控在 114/115 邊,美匯指數推低至 80 邊界左右。種種手法都係要美國聯儲局不能減息。而大莊就係本港 8 月期指結算前,小試牛刀,推高 Yen 價,踩低美股,順勢係香港搵番一筆。8 月期指結算後,Yen 價即刻返回 115/116,美股上返 (當時油價約在 73.XX 水平)。

一切已經準備就緒,而 rehearsal 亦都非常成功,現在只靜待 7/9 來臨。

7/9 對香港來說是一個關鍵的日子。因為當日實在有太多不明朗因素,HSI 會在 10/9 rebalancing , 7/9 為 rebalancing 前最後一個交易日,預期指數基金會係最後一刻換馬,HSI 波動可期。美國當晚發表 8 月份 unemployment rate 同 non-farm payroll,預期會有大龍鳳。911 6 週年嚟緊,Bin Laden 已經發表錄影講話。外面尚有一個 SPX 700 Calls 之謎,金融市場係唔係有機會 meltdown ?若果 7/9 美國股市真係大瀉,911 o個日真係有恐怖襲擊,咁港府能否在 10/9-12/9 擺平震蕩,實在存疑。較佳辦法就係先發制人,所以我會用 "警長理論" 嚟解釋港府係 7/9 入市嘅原因。稍後將會詳細輪及,以下講講以港股直通車為代表嘅各方金融洪水。

市場一直傳言有中東資金入咗嚟香港,又話有日本資金,事實上呢 d 都係傳言。真正知道嘅只有任志剛、曾特首等小數幾人。我亦都可以話係祖國同胞向世界各地親友、子子孫孫借錢再匯來香港炒股。事實上,有好多華人o係海外僑居,亦積累大量財富。譬如有好多上海人、溫州人等已經移居外地,佢地知道港股直通車就快開動,緊係會匯錢嚟炒埋一份。移居外地嘅港人亦唔小,版主咪一樣係外地遙遠買賣港股。當然其中尚有 QDII 及內地同胞偷步來港嘅熱錢,各方熱錢匯集,所以香港上週嘅港匯指數高企。

但係港匯指數高企會唔會係因為亞爺直接放水落嚟香港,所以升高呢?從政治層面睇就唔會。我係 8 月中就曾出 post 講過 -- 國內政策有 ""一放即亂、一亂即收" 的傾向,新政策的作用尚有待觀察。" 現在一嚟已經叫停港股直通車,二嚟講緊金融安全,十一大前應該唔會做嘢,三嚟放水落嚟香港俾邊個接 -- 俾中銀國際?定係俾其他金融機構?淨係呢點都可以有排煩。所以亞爺係唔會放水落嚟香港嘅。再從港股表現分析,實在感覺唔到有大水落咗嚟。全星期只係得 7/9 有較大成交,其餘都係平平。再睇真 d ,港股試過一日係恒指升,國企指數跌;第二日就剛剛相反。若果有亞爺係度,又點會有 d 咁奇怪嘅現象。我嘅推論係市場充斥著大量游資,而佢地係屬於唔同嘅單位 -- 有 d 鍾情藍籌,有 d 喜愛國企,而佢地係各自搵食嘅。另外,從港股俾人質低 200 - 300 點後,必定有人迅速出嚟買貨嚟睇,我有理由相信現時接貨嘅可能係大陸 / 海外華僑嘅游資,因為個 pattern 實在太似國內同胞嘅做法。

跟住要講講拆息高企呢個現象。有人認為咁樣係代表有錢流出香港,但係我想反問點解港匯指數高企同拆息高企兩個現象會同時出現?如果有錢流出香港,咁港匯指數係唔係應該回落?我嘅推測係拆息高企其實係金管局係度做緊嘢,抽緊銀根,發出訊號俾外資大戶睇:唔好衝擊港股,如果唔係就再扯高拆息。7/9 收市後,拆息好奇妙地回落了。



Sheriff Theory

好了,要講講我嘅 "警長理論" 了。

大家如果有睇西部片或警匪片,d 西部警長或者差佬,如果遇上惡霸、黑幫中人,緊係 show show 自己嘅警鎗、或者自己個 badge,等 d 壞人知難而退。

Show 警鎗 / Badge 嘅作用係乜嘢?就係話俾 d 壞人聽 "Sheriff is in town. Don't mess with me"

當日香港嘅情況係:大戶做淡嘅部署已經做好,準備好 10/9 係香港提款。特區政府見勢色唔對,一於係 7/9 出嚟做小小嘢,買 388 嚟托住個市。而買 388 又只係買到 over 5% 小小,目的就係 show 吓個 Badge,露吓支炮仔,話俾眾大鱷聽: "I'm in town. Don't mess with me"

結合拆息高企同埋港府高調買進 388 等行動觀察,港府入市嘅目的實際係預防 7/9 美股震蕩殺至香港嘅 "防風措施",情況就好似打 8 號風球前,我地會係當風嘅位置用木板封住 d 窗,避免 d 飛沙走石打中玻璃一樣。

至於點解選中 388 而唔買其他藍籌?其實好簡單 -- 10/9 HSI rebalancing,5 號 同 941 唔啱駛;買 6 行 (約佔 HSI rebalancing 後嘅 20%) 又會將資金分散;最佳嘅做法就係買 388 ,用 24 億買 388,要剛剛 over 5%,跟住好高調咁出去宣佈話自己支持港交所,實質就係要話俾眾大鱷聽,唔好攪香港。

另外要講講買入 388 有冇其他目的。小弟認為有,而且支持市場嘅講法 -- 就係港交所將來會同上交所合併,不過係邊個食邊個,就完全估唔到。以香港人嘅思維,緊係話港交所會食咗上交所,但係事情會唔會咁理想?大家試想想,十一五計劃雖然將香港定位為國際金融中心,為國企集資,幫助中國走向世界金融大舞台。但進入 2007 後,上海、深圳兩地股票市場熱火朝天:兩地市場每日成交額加埋已超越香港,開戶人數日日都話十萬,集資成效比香港有過之而無不及,你話香港嘅定位係咪有 d 笈笈可危。早前,941 仲話要回歸 A 股,呢個簡直係香港國際金融中心能否保持嘅黃色警報。加上港股直通車未開已經嗌停,簡直係雪上加霜,禍不單行。

好了,到了十二五計劃,亞爺審議香港定位時,假設香港國際金融中心地位已經退色,亞爺會唔會考慮俾上交所食咗港交所?又或者港交所係十二五前,想主動食咗上交所;甚或掉轉嚟做 -- 自動獻身俾上交所。無論情況如何,如果有港府呢個大股東照住,係咪比較容易 d 同亞爺傾,又係咪比較容易 d 擺平港交所內其他外資股東。所以 7/9 港府買 388 除咗比 signal 外資大鱷睇 -- 唔好攪香港外,仲係一個長遠部署嘅第一著棋。最終港府必定會買 388 至 20-30% 控股權。

香港嘅未來定位已經係 7/9 行出重要嘅一步;而香港嘅金融市場保衛戰,亦係 7/9 開出了第一鎗。各位等睇好戲罷!



上面用咗風暴理論解釋港股窄幅上落、港匯高企、拆息高企等現象,現在再用風暴理論嘗試解釋港股為何會急速反彈、屢創新高,並進佔 24,000 區域。17/8 全球股災難產,大家慶幸逃過一劫時,香港嘅外資大鱷發覺突然殺出程咬金 -- 港股直通車,意味著有大量新嘅投資 / 投機人仕來港搶貨。若果當時繼續做淡出貨,則將來可能會失去左右香港股市嘅籌碼,或者需要以更大嘅本錢才能取回主動權(國內炒股人仕有在大跌市唔肯放貨嘅傾向及能力),係短期利益要讓路俾長期利益嘅思維下,同埋考慮重新做淡需要時間部署,權衡輕重下,當然要即刻入市去搶貨,所以港股迅速反彈並創出新高。好了,股市節節上升,但港股直通車只聞樓梯聲,不見人下來。到了國內"財經"雜誌都批評港股直通車時,之前認為有可能出現嘅競爭對手,現已肯定被縛手縛腳,短期肯定唔會構成問題。係咁嘅情況下,本港外資大鱷自然可以重新考慮做淡。要做淡並賺盡,首先就要營做美好前景嘅假象:第一步係 23,500 做好個底,等人認為港股已經企穩陣腳。第二步,上試 23,800,殺 6366 熊仔;即日再上 24,000 ,殺 6362 ,等一部份睇淡嘅老散投降。淡友小咗,要穩固好友信心 -- 辦法係響 24,000 左右橫行,間唔中上多 d ,去吓 24,100,殺多隻熊,再摧毀部份睇淡老散嘅信心。由 17/8 至 9 月初,港股急速反彈,並在創新高後在高位徘徊,睇淡嘅老散所剩無幾,不過大鱷胃納無窮,所以我認為大鱷有機會在 7/9 前上試 24,300 甚或 24,500 然後掉頭向下。若果真係去到 24,500,我相信淡友肯定走得八八九九。結果上週大市只係去到 24,300 樓下,便掉頭向下。

我認為港股在 7/9 有機會大幅向下,為美股大跌開路,但當天港府入市干預,扭轉了局勢。現時推測後市去向,甚為困難,套用一句時下講法:港股面貌已被扭曲。但我相信金融風暴尚未完結,大莊造淡之心仍然未變,本港外資大鱷候機踩低港股之心未改。而可以踩低港股之時機為本月中,當美國金融機構公佈業績時,便是出手時候。
arrow
arrow
    全站熱搜

    kmingng1226 發表在 痞客邦 留言(0) 人氣()